پاکستانی اداکارہ کنزہ ہاشمی کا کہنا ہے کہ جب میں کام کے سلسلے میں کراچی آئی تو سینئر اداکارہ صبا فیصل نے بہت مدد کی۔ ہمارے درمیان سینئر اور جونیئر کا نہیں بلکہ دوستی کا رشتہ ہے۔
حال ہی میں نجی فیشن میگزین کے یوٹیوب پروگرام میں بطور مہمان شرکت کرنے والی اداکارہ نے دل کی باتیں کی۔
انہوں نے ایک سوال کے جواب میں انکشاف کیا کہ جب میں پہلی بار کام کے لیے کراچی آئی تو صبا فیصل نے میرا بہت ساتھ دیا اور بہت مدد کی۔ صبا فیصل میرے لیے فیملی کی طرح ہیں، وہ میرے لیے بالکل دوستوں کی طرح ہیں۔
اداکارہ کا کہنا ہے کہ ہم دوستوں کی طرح بات اور گپ شپ کرتے ہیں۔ ہمارے درمیان کبھی سینئر اور جونیئر کا رشتہ نہیں رہا۔
کنزہ ہاشمی نے مزید کہا کہ میں ہمیشہ ان لوگوں کے لیے کچھ نہ کچھ کرنے کی کوشش کرتی ہوں جن سے مجھے پیار ہے۔ ایک بار صبا فیصل کی سالگرہ تھی اور اس وقت ہم ایک پروجیکٹ پر ساتھ کام کر رہے تھے۔
انہوں نے بتایا کہ میں نے سوچا کہ صبا فیصل کے بچے تو ان کی سالگرہ میں کچھ نہ کچھ تو کریں گے اس لیے مجھے کچھ الگ کرنا چاہیے تو میں نے 2 ماہ تک ان کی تصویریں اکٹھی کیں، پھر 6 فٹ شیشے کا فریم لیا، اس میں تصاویریں چسپاں کی اور ایک کولاج تیار کیا اور ان کی سالگرہ پر ان کے گھر لے کر پہنچ گئی، جسے دیکھ کر وہ بہت خوش ہوئیں۔
